Ano ang paghahambing?
Ang paghahambing ay paglalarawan ng antas o lebel ng katangian ng tao, bagay, hayop, ideya at pangyayari. Naghahambing ng dalawang magkaibang antas o lebel ng katangian ng tạo, bagay, ideya, pangyayari, at iba pa. May dalawang uri ang kaantasang pahambing.
May dalawang uri ang kaantasang pahambing. Paghahambing na magkatulad at di-magkatulad.
Ang pahiwatig na paghahambing ay metaphor — isang uri ng panghahambing ng dalawang bagay na magkaiba, ngunit tinutukoy kung ano ang katangiang pinag-uusapan. Tinatawag din itong pagwawangis sa Tagalog.
Paghahambing na magkatulad
Ginagamit ito kung ang dalawang pinaghahambing ay may patas na katangian. Ginagamitan ito ng mga panlaping ka-, magka-, ga, sing kasing-, magsing, magkasing – at mga salitang paris, wangis/ kawangis, gaya, tulad, hawig/ kahawig, mistula, at mukha/ kamukha.
MGA HALIMBAWA
- Si Rama at Lakshamanan ay magkasingkisig.
- Si Hanuman ay tulad ng isang malakas na mandirigma.
- Mistulang diwata ang kagandahan ni Sita.
(ang panlaping magkasing-, mistula at tulad – ay nangangahulugang kaisa o katulad)
MGA HALIMBAWA
- Magkasingganda ang bansang India at Singapore.
- Kasimbilis ng kidlat ang pagsulong ng bayang ito sapagkat sila ang sentro ng teknolohiya.
- Ang dalawang bansa ay magkasingyaman.
Ang panlaping kasing- at kasim- na ginamit sa pangngusap aygaya rin ng ka-, nagagamit ito sa lahat ng uri ng pagtutulad, Ang pinagtutulad ay mapapansin sa paksa ng pangungusap.
Paghahambing na Di-Magkatulad
Nagbibigay ito ng diwa ng pagkakait, pagtanggi, o pagsalungat sa pinatutunayang pangungusap. Ito ay may dalawang uri hambingang pasahol at palamang.
Hambingang Pasahol: May higit na katangian ang pinaghahambingan sa bagay na inihahambing.
Hambingang Palamang: may higit na katangian ang inihahambing sa bagay na pinaghahambingan.
HAMBINGANG PASAHOL
- Ginagamit ang lalo, di-gasino, di-gaano at di-totoo upang maipakita ang ganitong uri ng paghahambing.
- Lalo – nangangahulugan ng pagdaragdag o pagpapahigit sa kulang na katangian. Sinusundan ito ng katuwang na panghambing na kaysa kay, kung ngalan ng tao ang pinag- hahambingan, kaysa o kaysa kung ngalan o pangyayari ang ihahambing.
Halimbawa: Lalong mahusay sa labanan si Rama kaysa sa mga alagad ni Ravana.
- Di-gasino – ginagamit sa paghahambing ng uri o katangian ng mga tao. Sinusundan ito ng alinman sa mga katagang naghahambing, kabilang ang gaya, tulad, para, o paris na sinisundan ng panandang ni.
Halimbawa:
- Di-gasinong maalalahanin si Sita tulad ni Lakshamanan.
- Di-gasinong naging maingat si Maritsa paris ni Surpanaka.
- Di-gaano– tulad lang din ng di-gasino ang gamit subalit sa mga hambingang bagay, lugar o pangyayari lamang ginagamit.
Halimbawa: Di-gaanong mapayapa sa Lanka kaysa Ayodhya.
- Di-totoo – nangangahulugan ng pagtawad o pagbabawas sa karaniwang uri. Nagagamit itong pamalit sa di-gasino at di-gaano.
HAMBINGANG PALAMANG
- May mahigit na katangian ang inihahambing sa bagay na pinaghahambingan. Naipakikita ito sa tulong ng sumusunod:
- Lalo – Ang diwa ng paghahambing ay magiging kalamangan at di kasahulan kung ang sinasamahang pang-uri ay nagpapahayag ng kalakhan, kataasan, kalabisan at kahigitan. Muli, katuwang nito ang kaysa/kaysa sa/kay.
Halimbawa: Lalong kahanga-hanga ang katapangan ni Rama kaysa kay Maritsa.
- Higit/ mas/ labis – tulad ng kaysa/ kaysa sa/ kay: sa sarili ay nagsasaad ng kalamangan kung ginagamit ito sa paghahambing.
Mga Halimbawa:
- Higit na malakas si Rama kaysa kay Ravana.
- Labis ang pagmamahal ni Rama sa kanyang asawa na si Sita.
- Di-hamak – kung ginagamit ay karaniwang isinusunod sa pang-uri.
Halimbawa: Di-hamak na matapang at maalalahanin si Lakshamanan kaysa kay Sita.
MODERASYON O KATAMTAMAN
Ang moderasyon o katamtaman na uri ng pang-uring pahambing ay naipakikita sa pag-uulit ng pang-uring may panlaping ma-, sa paggamit ng salitang medyo na sinusundan ng pang-uri ,sa paggamit ng katagang may na sinusundan ng pang-uring nabuo sa pamamagitan ng mga panlaping kabilaang ka/-han.
Halimbawa: Medyo kinabahan si Maritsa nang labanan si Rama.